Татар халкының бөек шагыйре Габдулла Тукай туган апрель ае Казаныбызда Тукайлы чараларга шактый бай булды. Мондый кичәләрне дәвам итеп, бүген, 28 апрельдә лицеебызда мәшһүребезгә багышланган «Тукайдан илһам алып...» дип исемләнгән шигърият кичәсе үтте. Әлеге чараны лицеебыз «Салават» яшьләр үзәге белән бергә оештырды. Шигърият кичәсендә укучылар, «Салават» яшьләр үзәге артистлары Ватанга, туган якка, милли моңнарыбызга һәм халыкка ихлас мәхәббәт белән сугарылган Тукай иҗатының гүзәл үрнәкләрен – «Су анасы», «Шүрәле», «Туган авыл», «Пар ат», «Милли моңнар» кебек әсәрләрне башкардылар.