18 нче февраль көнне Сарман урта мәктәбендә якташыбыз, татар халык җырчысы Илһам Шакировка багышланган түгәрәк өстәл уздырылды. Укучылар белән очрашуга Шакиров Флүр Кыяметдин улы – Илһам Шакировның бертуганының улы, И.Шакиров исемендәге I республика премиясенең "Халыкчан җыр" номинациясе лауреаты һәм үзешчән артист; шулай ук Хаҗиев Илһам Муллый улы – И.Шакировның ярдәмчесе, иң якын дусты, аны тәрбияләүче, аның җырларын пропагандалаучы кеше; һәм якташ язучыбыз Аяз Гыйләҗевнең улы - Гыйләҗев Мансур Аяз улы – язучы, драматург, киносценарийлар авторы, Татарстан Язучылар берлеге әгъзасы килгән иде.
Алар мәктәп тарихы, музей, укучыларның һәм укытучыларның эшчәнлеге, мәктәп тормышы белән таныштылар. Аннан соң түгәрәк өстәл янында укучыларны кызыксындырган сорауларга җавап бирделәр. Кунаклар Илһам абый турында үзләренең кызыклы хатирәләре белән уртаклаштылар. Чара җырчының Дамир Гарифуллин сүзләренә иҗат ителгән “Чыгарсыңмы каршы алырга?” (“Сарман вальсы”) җырын күмәк башкару белән тәмамланды.
Гомумән, очрашу файдалы һәм күтәренке рухта үтте.