«Милләтемнең кояшы син, и моңлы Тукай, нурлы Тукай!”

Әнә шундый исем астында Сарман аграр көллиятендә Бөек татар шагыйре Габдулла Тукайның тууына 130 ел тулуга багышланган әдәби атналык үтте. Көллият студентлары “Сарман мәгълүмат-мөхәррият үзәге” Үзәк китапханә белән берлектә уздырган шигырь бәйрәме кысаларында “Мин татарча сөйләшәм” акциясендә актив катнаштылар, Грамота белән бүләкләнделәр, әдәби-музыкаль кичәдә шагыйрьнең тормыш юлына, иҗатына күзәтү ясадылар, шигъри осталыкларын күрсәттеләр, документаль фильмнар карадылар, викторина сорауларына җавап бирделәр, Тукай әсәрләрен сәхнәләштерү буенча “Күкрәгемдә шигырь уты янганда...” дигән исем астында үткәрелгән Республика конкурсында катнаштылар.  “Нәрсә? Кайда? Кайчан?” интеллектуаль клубының чираттагы уены да Тукай иҗатына багышланган иде. Атналыкны әзерләгән укытучыларга, актив катнашкан студентларга чын күңелдән олы рәхмәт сүзләрен җиткерәсе килә.

Тукай, аның иҗаты мәңгелек. Тукайсыз узган еллар саны гына да 130 икән бит. Әмма Тукай бүген дә әдәбиятның алгы сафында баруын дәвам итә, бүген дә татар поэзиясенең остазы, юлбашчысы булып кала бирә. Чын шагыйрьләрнең гомере арифметик саннар кысасына сыя алмый. Чын шагыйрьләрнең гомере халык хәтере белән исәпләнә.