21 февраль Халыкара туган тел көне. Шул уңайдан  күренекле шагыйрь, публицист язучы, “Керәшен сүзе” газетасына нигез салучы авылдашыбыз Ямаш Игәнәйнең “Изгелекккә әйдәр уем” исемле китабын тәкъдир итү кичәсе булды. Килгән кунакларны Ләке мәктәбе укучылары матур шигырьләре белән каршы алдылар. Чара музейда дәвам итте, анда музей җитәкчесе Ильина Д.Р. кунакларга Я.Игәнәйнең тормыш юлы, иҗаты турында сөйләде, бигрәк тә шагыйрь тарафыннан керәшеннәр турында чыгарылган  беренче публицистик басма “Керәшен сүзе” газетасының эчтәлеге, аның тарихы, мәкаләләренең үзенчәлеге турында мавыктыргыч мәгълүматлар җиткерде. Укучылар чыгышын килгән кунаклар зур кызыксыну белән тыңладылар. Я.Игәнәй язышкан “Аргамак”, “Идел” журналлары хакында да сүз булды. Иң куандырганы шул: бүгенге көндә мәктәп аның исемен йөртә, Ямаш Игәнәй урамы бар, паркка нигез салынды. Без авылдашыбыз белән горурланабыз.