Күтәмәлетөп гомуми белем бирү мәктәбендә белем алучы балаларның табигый сәләтләрен ачу һәм үстерү буенча максатчан эш алып барыла. Быелгы уку елында моның өчен мөмкинлекләр дә ачылды: атнага 9 сәгать өстәмә белем бирү дәресләре үткәрелә. Аларда балалар белән Хөсәенова Венера Рафиз кызы шөгыльләнә. Ул укучыларга бию, чигү, кул эшләре, кәгазьдән, камырдан, табигый әйберләрдән төрле уенчыклар, сувенирлар ясау серләренә өйрәтә. Шөгыльләр балаларның яшь үзенчәлекләрен исәпкә алып үткәрелә.

   5-7 нчы март көннәрендә мәктәптә “Язгы тәэсир” исемле ярминкә-күргәзмә эшләде. Анда “Рукоделие”, “Бумажная пластика”, “Забытые мотивы” (чигү), “Мастерилка” түгәрәкләрендә шөгыльләнүче балаларның һәм укытучы Хусаенова Венера Рафиз кызының кул эшләре куелды. Әти-әниләр, мәктәп кунаклары, укучылар, укытучылар күргәзмәне  соклану катыш зур кызыксыну белән карадылар, күңелләренә аерата хуш килгән әйберләрне сатып алдылар.