Мәктәбебез “Яшьләр профсоюзны сайлый” республикакүләм акциясенә кушылды. Атналыкның иң кызыклы, эшлекле  чараларының берсе  – “Профсоюз дәресе” булды. Безнең өлкән сыйныф укучыларын иҗтимагый оешманың тарихы белән таныштырудан тыш, аның кеше, аеруча яшьләр тормышындагы ролен ачып бирәсебез килде. Моның өчен КФУ студентларының үз профкомнары турында ясалган видеоролигын файдаландык. Бүгенге мәктәп укучылары бик тиздән ВУЗ студентлары булачаклар. Әлегә  әти-әниләр,  укытучылар кайгыртучанлыгын һәрдаим тоеп яшәгән егетләр-кызларга алдагы тормышларында сыеныр урын булачагы турында сөйләүче язма иде ул.
Гомумән,  кеше  иҗтимагый оешмаларда үзенә яклау да, теләктәшлек тә таба ала. Андый оешмалар аз түгел. Дәресебезгә килгән кунаклар укучыларга шуны бик ачык күрсәттеләр. Бистәнең ветераннар советы рәисе Әнисә апа Минһаҗева өлкәннәр белән алып барылган эшчәнлек белән таныштырды. Аның һәр әби, һәр бабайны кайгыртуы,  аларның тормышларын бертөрлелектән арындыру өчен оештырылган чаралар өчен җан атуы залда утыручыларга да күчте. Бу апаның тынгысызлыгына соклану туды. Бистәнең хәрби учет өстәле хезмәткәре Халиуллина Эльвира Нәкыйп кызы районның әфганчылар, интернационалист сугышчылар оешмасы турында, үзләренең эшчәнлекләре хакында сөйләде. Егетләрне кызыксындырган армия тормышы турындагы сорауларга җавап бирде.
 Бистә башлыгы вазыйфаларын башкаручы Рафыйк Әзһәр улы Кәримов бистәнең  бүгенгесе, киләчәге хакында сүз алып барды. Укучылар аңа үзләрен борчыган сорауларны  бирделәр,  фикерләрен җиткерделәр.    Аларны игътибар белән тыңлады, сорауларга бик теләп җавап бирде.
Без: “Һәрнәрсә кешенең үзеннән тора,” – дияргә яратабыз. Тик бердәм булып, уртак теләк, уртак фикерләр белән яшәүчеләр булганда тормыш кызыклырак, нәтиҗәләр дә куанычлырак була. Бердәмлектә – көч. Ә Профсоюз - бердәмнәр оешмасы ул.
Ландыш Шәйдуллина, икенче санлы Җәлил мәктәбенең профсоюз оешмасы җитәкчесе