23-28 нче апрельләрдә мәктәбебездә татар теле һәм әдәбияты атнылыгы булып узды. Ул укучыларыбызны туган ил, мәктәп, туган тел темасына багышланган татарча җырлар, мәкальләр белән каршылаудан башланды.      

       Сишәмбе көнне 6 нчы сыйныфлар өчен Зиннәтуллина Ф.М. һәм Шакирова Э.Ш. сабантуй оештырдылар.Анда укучылар татар халкының милли бәйрәме турында күп яңалык белделәр, үзләре дә төрле уеннарда бик теләп катнаштылар.

      Чәршәмбедә 9 нчы сыйныфларда Әсәдуллина Ә.М. һәм Соловьева Ф.Ф. тарафыннан әзерләнгән, мәктәбебезнең беренче директоры  Азат Исмәгыйлов истәлегенә багышланган кичәгә аның кызы Заря Азатовна да чакырылган иде. Очрашу, тирән эчтәлекле булып, күңелләрдә җылы тәэсирләр калдырды.

      Пәнҗешәмбе көнне Шаймарданова Л.Н. һәм Нәбиуллина Л.Н. үткәргән “Халык иҗаты – милләтебезнең күңел көзгесе” дип исемләнгән бәйгедә 5 нче сыйныф укучылары үзара көч сынаштылыр. Командалар бик әзерлекле булып, бераз өстенлек белән 5 б сыйныфы җиңү яулады.

     Шушы ук көнне мәдәният сарае каршысында үткәреләгән бистәкүләм шигырь бәйрәмендә, үзләре язган шигырьләрен сөйләп, 9 нчы В сыйныфы укучысы Гиниятуллина Зөлфия (укытучысы – Вахитова Л.А.) һәм 6 нчы Б сыйныфыннан Байрашева Әлфия (укытучысы – Зиннәтуллина Ф.М.) Җәлил поселок муниципаль берәмлеге грамотасы белән бүләкләнделәр.

      Җомга көнне безнең укучыларыбыз, Г.Тукайның 126 еллыгы уңаеннан музейда үткәрелгән әдәби-музыкаль кичәдә катнашып, Җәлил нефть һәм газ чыгару идарәсенең рәхмәт хатына ия булдылар. Чыгыш ясаучылар арасында Шәйхетдинова Альмира (4 б, укытучысы – Бәдертдинова И.И.), Зиатдинов Динар (5 б, укытучысы – Шаймарданова Л.Н.), Насыров Илнар (9 б, укытучысы – Идрисова Г.Я.), Г.Тукай шигырьләрен сөйләп, тамашачыларның күңелен яуладылар.

      Атналыкның соңгы көнендә Вахитова Л.А. тарафыннан 6 а сыйныфында “Тел – күңелнең көзгесе” дигән темага йолдыз сәгате үткәрелде. Әлеге чарага укучылар тел турында шигырьләр дә өйрәнеп килгәннәр иде. Бәйгедә, иң күп йолдызны үзенә җыеп, Зиатдинов Рифат җиңүче булды.

      Атналык күңелле һәм файдалы үтте.