2012-2013 уку елы безнең өчен бик уңышлы башланды: Татарстан Республикасының барлык балалар бакчалары яңа укыту-методик комплектлар белән тәэмин ителде. Бу комплектлар балаларны ике дәүләт теленә өйрәтү, шул телләрдә сөйләшү, аралашу бурычларын үз эченә алды һәм тәрбиячеләр өчен көтеп алынган ярдәмлек булды. Чынлап та комплект һәрбер эшчәнлекне оештыру өчен төсле матур күргәзмә һәм таратма рәсемнәр, битлекләр, аудиоязма , бармак театрын үз эченә ала. Болар барысы да балаларның сүз байлыгын , сүзләрне отып калу аша хәтер, зиһенен үстерә һәм иң дә отышлысы гади диалогта катнаша белү күнекмәсен үстерә. Укыту-методик комплектларның төп компонетларыннан берсе –эш дәфтәрләре. Алар балаларга татар, рус сүзләрен истә калдырырга, аларны сүзтезмәләрдә һәм җөмләләрдә дөрес кулланырга бик нык ярдәм итә. Шулай ук тәрбиячегә дә материалны ныгытырга, эшчәнлеккә кызыксыну уяту, вакытында баланың хаталарын төзәтергә мөмкинлек бирә. Күп кенә ата-аналар дәфтәр белән эшне өйдә дә оештыралар. Бу баланың гына түгел, ә ата-аналарның да, балаларны өйрәтү сәләтләрен үстерү процессында активлыгын арттыра башлады. Яңа укыту –методик әсбапларны гамәлдә куллану өчен заманча җиһазлар: мультимедиа проекторлары, ноутбук, экраннар да кайтарылды. Безнең “Кояшкай”  балалар бакчасы педагоглары яңалыкларны хуплап каршылады . Һәрберсе үз эшендә файдаланып аның уңайлыгын,балалар өчен мавыктыргыч,кызыклы икәнлеген ачыклады. Дәүләт телләрен саклау һәм үстерү максатыннан башланган бу эш нәтиҗәле булыр, сабыйларыбыз киләчәктә халкыбызның иң кадерлле рухи мирасы булган телебезне саклап , баетып, матурлап , иң тирән фикерләрен җиткерер дәрәҗәдә камил белүгә ирешерләр.