Республикада, шул исәптән районда, укытучыларның һөнәри бәйгеләре бара.Бу бәйгеләрнең әһәмияте бик зур. Алар укытучыларның һөнәри осталыкларын үстерәләр, яңалыкка юл күрсәтәләр, нәтиҗәгә ирешү ысуллары, үзенчәлекле эш алымнары белән таныштыралар. 18нче февраль көнне Зур Нөркәй урта мәктәбендә “ Ел укытучысы” конкурсының зона туры үтте. Анда Сарман №1, Мортыштамак, Сарайлы, Ләшәү Тамак, Азалак, Юлтимер, Карашай Саклау, Саклаубаш, Зур Нөркәй урта мәктәпләреннән 10 укытучы көч сынашты.Конкурста катнашучыларга 2 тур сынаулары аша үтәргә туры килде. Беренче турда укытучылар үзләре белән таныштырдылар, үз эшчәнлекләрендә куллана торган инновацион технологияләр, аларның нәтиҗәләре турында сөйләделәр. Икенче турда мастер-класс күрсәтелде. Монысы укытучыдан федераль дәүләт белем бирү стандартларына туры килә торган яңа технологияләрне эшчәнлектә уңышлы күрсәтүне, иң отышлы алымнарны башкалар белән дә уртаклашуны сорый торган төп сынау иде. Бәйгенең ике сынавын да мәртәбәле хөкемдарлар бәяләде. “Ел укытучысы” муниципаль турында катнашу хокукын Сарман №1 мәктәбеннән Рамазанова Э.Т., Юлтимер мәктәбеннән Зарипова Г.Ә. һәм Саклаубаш мәктәбеннән Нуриева Т.Р. яулады. Без аларга зур уңышлар телибез.