Лагерьда бүгенге көнебез «Сәламәтлек дәресләре” дип аталды.

Балалар , ФАП мөдире Харисова Л.З. белән очраштылар, ул балаларга файдалы һәм зарарлы гадәтләр турында әңгәмә үткәрде. Шулай ук  практикант егетебез Тухбатуллин Райнур тарафыннан “Мойдодыр дуслары” турында әкият сөйләнелде, рәсемнәр ясалды.

«Сәламәтлек дәресләре”  темасын дәвам итеп,тәрбия сәгатьләрендә алган белемнәрен барлау,ныгыту максатыннан  Раушания Закариевна укучылар белән сораулар һәм биремнәргә җаваплар тапты.

Төшке аштан соң музыка астында күңелле уеннар үткәрелде.

Бүген лагерьнең 8 нче көне... Күңелле уеннар,кызыклы очрашулар дәвам итә. Ә бүген  көнебез “Башваткычлар чишәбез”дип аталган кызыклы уен белән башланып китте.

 Халкыбызның татар халык уеннары  һәм җырлары белән урелеп барган мавыктыргыч чара балалар күңеленә хуш килде. Тәмле төшке аштан соң, балалар “Кояш куяны -2018 “ рәсем конкурсында актив катнаштылар.

 “Җир шары- уртак йортыбыз!” Ә йортта барлык яшәүчегә дә уңайлы,чиста булырга тиеш. Ә ул уңайлылыкны Кеше үзе булдыра ала бит. Кечкенә яшьтәге мәктәп укучылары моны белеп торырга тиеш. Шул максаттан, бүген лагерьга йөрүче укучылар белән, “Син табигатьне беләсеңме?” исемендә викторина уздырылды.Укучыларыбыз тагын бер кат табигатьнең  кеше тормышында  әһәмияте бик зур икәнлегенә төшенделәр.

Алар, әйдәгез, бергәләп туган җир, туган йорт сагына басыйк, җир-анабызга карата рәхимле булыйк дип сүз бирделәр.

Табигатьтә хәрәкәтле уеннар уйнадылар,күңелле ял иттеләр.

“Без онытмыйбыз, Без горурланабыз!”. Сугыш хәтирәләре беркайчан да онытылмый. Батырларның кылган изге гамәлләре, данлы исемнәре бүгенге көндә әкиятләргә күчкән, җырларга кергән. Без бу дәһшәтле сугышта катнашкан үзебезнең әби – бабаларыбыз, абый-апаларыбыз, якын туганнарыбыз турында сөйләштек, обелискта булдык.

            Дөньяда яшәүче барлык кешенең бер теләге бар – туган илдә тынычлык булсын! Аларга мәңгелек дан һәм мәңгелек хөрмәт!

Бүген мәктәбебездә  “Хыял” мәктәп яны ял һәм сәламәтләндерү лагерена йөрүче балалар Лесхоз бистәсендә урнашкан урман хуҗалыгы музеенда булдылар. Урман хуҗалыгының эшчәнлеге, аның тарихы белән таныштылар.

Шулай ук дендрарийда да булдылар. Биредәге үсентеләрне, агачларның күплеген  күреп хозурландылар. Биредә урман хуҗалыгы эшчеләре бик тырышып, 11,25 га  җирдә матур ландшафт булдырып, Ерак Көнчыгыш,  Европа һәм Азиядән бик күп төр үсенте утыртканнар. Балалар һәр агачны бик кызыксынып карадылар, сөйләгәннәрне тыңлап, үсентеләргә карап сокланып кайттылар.

Лагерьның 4 нче көнендә “Ветеран,ничек яшисең син?” темасына чаралар узды.

Сугыш... Нинди дәһшәтле, куркыныч сүз. Бу сүз бөтен  кешене дә тетрәндерә. Бөек Ватан сугышы тәмамланганга күп вакытлар үтсә дә, аның хәсрәте гомер буена бара.Узган чаралар барышында укучыларыбыз шуңа тагын бер кат инандылар да инде. Еллар үткән саен сугыш ветераннары саны кими бара. Без алар алдында түләп бетермәслек  бурычлы. Шуны онытмасак иде.

Сугыш уты беркайчан да кабынмасын. Киләчәктә күкләребез гел  аяз, тормышыбыз тыныч  булсын иде.

“Балалар, әйдәгез дус булыйк!”.

Лагерьның бүгенге темасы нәкъ әнә шундый. Дуслык иле-кызыклы ил ул. ДУСЛЫК һәм ТАТУЛЫК булганда бар уңышка ирешеп була.

Бүген, “Дуслык  аланында”  укучыларыбыз  дуслык,татулык турында сөйләштеләр, рәхәтләнеп уйнадылар,биеделәр,җырладылар.

Лагерьның 2 нче көнендә “Туган ягыбызны яратабыз” темасына чаралар узды. Викторина барышында Туган якның үткәне,бүгенгесе һәм киләчәге турында да әңгәмә оештырылды.Укучыларның белемнәре тагын бер кат барланды, тулыландырылды. Укучылар туган җир турында үзләре белгән шигырьләрен сөйләделәр, җырлар җырладылар.

Хәрәкәтле уеннар, күңелле биюләр дә балаларның күңеленә хуш килде.

Бүген мәктәбебездә “Хыял” мәктәп яны ял һәм сәламәтләндерү лагеры үзенең эшен башлап җибәрде.

Иң беренче укучыларыбыз лагерь,андагы тәртип һәм куркынычсылык кагыйдәләре белән таныштылар.

Һәр елның җәй башында иң матур, якты, истәлекле бәйрәмнәрнең берсе булган Халыкара балаларны яклау көне уздырыла. Шушы бәйрәм уңаеннан иң изге теләкләр юллыйбыз. Бәхетле һәм сәламәт булыгыз. Әти-әниләр, өлкән яшьтәге ихтирамга лаеклы кешеләр балаларыбыз белән һәрвакыт горурланып, аларның игътибарын, мәхәббәтен тоеп яшәек. Йөзегездә һәрвакыт елмаю булсын.