Мәктәп!.. Кем генә үзенең сабый чагын, балачагының бәхетле мизгелләрен сагынып искә алмый икән?! Кем генә үзенең тәүге укытучысы белән очрашулар көтеп яшәми икән?! 18 октябрь көнне Эзмә урта мәктәбе коллективы “Әй, мәктәбем белем учагы, син гомернең иң гүзәл чагы” дип исемләнгән мәктәпнең 80 еллыгына багышланган кичә үткәрде. Төрле елларда Эзмә урта  мәктәбендә белем алган, хәзерге вакытта илебезнең төрле төбәкләрендә гомер итүче, төрле өлкәләрдә зур дәрәҗәләргә ирешкән сабакташлар, хөрмәткә лаек укытучылар, район җитәкчеләре бәйрәмнең кунаклары булдылар. Беренче өлештә мәктәп базасында экскурсияләр, ачык дәресләр каралды,  икенче өлешендә Эзмә мәдәният йортында  тантаналы кичә узды. Кичәдә гомерләрен балалар укытуга багышлаган, инде хәзер лаеклы ялда булган өлкән буын ветеран укытучылар һәм хезмәткәрләр хөрмәтләнде.