Елдагыча, Саба аграр көллияте быел да укуда, спортта, сәнгатьтә алдынгы булган, шулай ук бүгенге көндә әтиләре  махсус хәрби операциядә катнашучы мәктәп укучыларын үзенә – район хакимияте башлыгының Чыршы бәйрәменә җыйнады.  Чарада районыбыз мәктәпләрендә һәм аграр көллияттә белем алучы  362 укучы катнашты. Бирегә килүчеләрне һәр почмакта аниматорлар уен-көлке, җыр-бию белән каршы алды. 7 төрле юнәлештә мастер-классларда катнашып, үз кулың белән ясалган бүләк белән кайтып китү мөмкинлеге дә булдырылган иде.  Бүләкләр дигәннән, алар бүген күп булды.  Һәр укучыга смарт-сәгать, тәм-томнар, уеннарда катнашучыларга да бүләкләр таратылды. Район башлыгы Рәис Нургали улы Миңнеханов котлавыннан соң, сәхнәдә Яңа ел тамашасы башланып китте. Аннары чыгышларны фокусчы-иллюзионист Александр Тепляков, “Аркадия” шоу-төркеме дәвам итте. Шулай ук үзебезнең нәни артистларның да чыгышы алкышларга күмелде. Кыскасы, укучылар бәйрәмнән яңа көч, дәрт һәм бәйрәмчә хис-кичерешләр белән таралыштылар.