Игенченең иңнәре

Кулымда ипи телеме,

Әй, йомшак ул, уңган ул.

Күзәнәге саен һава,

Шундый җиңел булган ул.

Үлчәүгә салып карасаң

Әгәр шушы телемне,

Герләр аның авырлыгын

Әйтеп бирер идеме?

Юк, юк, аны үлчәр өчен,

Җитмәс гер көче генә.

Аның төгәл авырлыгын

Белә игенче генә.

Еллар елга охшамый,

Үзгәреп тора һава:

Икмәк үскәндә көйдерә,

Җыйганда- яңгыр ява.

Игенче үз  иңнәренә

Күтәрә бит барчасын :

Коры елларның хәсрәтен,

Явым еллар җафасын.

Ипине дөрес үлчәмәс

Хәтта аптек герләре

Аны төгәл үлчи бары

Игенченең иңнәре...