26 нчы март көнне Шәмәрдән культура йортында "Мәхәббәт аша тәрбия" дип исемләнгән семинар булды. Бу семинарны АНО "Хаят" җитәкчесе Фатхрахманова Гөлнара Шәүкәт кызы мәктәпкә беренче класска баручы балаларның ата-аналары, тәрбиячеләр, укытучылар өчен оештырды. Семинарга бик мәртәбәле, кирәкле спикерлар чакыртылган. Мәсьәлән: Алия Юныс кызы Шагаева - педагогия фәннәре кандидаты- "Ата-ана һәм укытучы. Ничек итеп бердәм нәтиҗәгә ирешергә?" темасына, Гыймранова Диләрә Габделкави кызы - филология фәннәре кандидаты "Бала тәрбияләүнең өч баскычы" темасына, Галимуллина Эльвира Ринат кызы - эшмәкәр, күпбалалы әни - "Чисталык һәм әйләнә тирәдәге матур мөһит баланың белем алуына ничек тәэсир итә?" темасына, Мөхәммәтҗанова Ирина - тирәлекне оештыру буенча тренер - "Укучының эш урынын дөрес оештыру, аны тәртиптә тоту серләренә төшендерү" темасына чыгыш ясадылар. Семинар бик файдалы булды һәм эшлекле рухта узды.