Якшәмбе иртәсендә съезд кунаклары һәм делегатлар республикабызның төрле районнарына сәяхәткә чыгып киттеләр. Арча, Балтач, Кукмара, Саба, Питрәч районнары халкы чит төбәкләрдә һәм илләрдә гомер итүче милләттәшләребез белән танышу, аралашу мөмкинлегенә ия булдылар. Сәяхәт кысаларында кунаклар төрле экскурсияләрдә, истәлекле урыннарда, музейларда авыл тормышы белән якыннан таныша алды. Җыр, бию, җанлы аралашулар кунакларда да, хуҗаларда да зур тәэсир калдырды. Милләттәшләребезгә кунакчыл хуҗалар истәлекле бүләкләр, кул эшләнмәләре тапшырдылар.

Конгресс кунаклары Cаба районының Балалар иҗат үзәгенә сәяхәт кылдылар, андагы иҗади эшчәнлек белән таныштылар. Кунакларны милли ризыгыбыз – чәкчәк белән каршы алдык. Хезмәткәрләребез әзерләгән концерт номерларыннан, милләтебезгә булган җылы хисләрне тагын бер кат тоеп, кунакларыбыз  Саба районы буенча сәяхәтләрен дәвам иттеләр.