Илебез буенча октябрь ае башында Өлкәннәр көне уздырыла. Төрле җирләрдә өлкәннәрне котлаулар, бүләкләүләр, искә алулар бара. Өлкән кешеләр – безнең әти-әниләребез, әби-бабайларыбыз. Алар бик күп авырлыклар күргән, дөньяның ачысын-төчесен  татыган кешеләр. Аларны өлкән булган өчен генә түгел, ә әти-әниләребез, әби-бабайларыбыз булган өчен дә хөрмәт итәргә тиешбез. Гомерләре буе хезмәттә кайнаган, сугыш  һәм сугыштан соңгы авырлыкларны иңнәрендә күтәргән, колхоз нужасын беренче көннәреннән үк тәртәгә җигелеп тарткан әби-бабаларыбыз картлык көннәрендә зур игътибарга, хөрмәткә лаек. 28нче сентябрь көнне Иҗат үзәгендә эшләп лаеклы ялга чыккан ветераннар белән очрашуны быел да чәй табыны артында уздырдык. Фирдәвес апа, Рәхимә апа, Зина апа, Әлфинур апа һәм Нурислам абый үзләре эшләгән вакытта булган истәлекләре белән уртаклашып, бер күрешү - бер гомер, дип безгә изге теләкләрен җиткерделәр. Бәйрәмнәр котлы булсын!!!