Байлар Сабасының спорткомплексы соңгы атналарда шау-гөр килеп тора. Биредә һәр кич оешма-предприятияләр арасында волейбол ярышлары үткәрелә. Шулай ук мәктәп укучылары да бу ярыштан читтә калмыйлар, киләчәктә район данын яклардай яшьләр үсеп килә. Биредә 28 нче март көнне укучыларның Бөтенроссия “Президент спорт уеннары” кысаларында волейбол буенча район ярышы булып үтте. Уеннарда үз зоналарында беренче һәм икенче урыннарны яулаган 15 команда катнашты. Уенчыларның хәзерлеге елдан-ел яхшырак булуы күзгә ташлана, һәр уен кызыклы һәм мавыктыргыч үтте. Ярышның нәтиҗәләре (кызлар): 1- Шәмәрдән лицее, 2 – Саба гимназиясе, 3 – З.Нырты урта мәктәбе командалары. Егетләр: 1- Мичән урта мәктәбе, 2 – Симет урта мәктәбе, 3 –Саба гимназиясе. Командаларга Балаларны сәламәтләндерү-белем бирү үзәгенең грамоталары һәм акчалата бүләк тапшырылды. Шәмәрдән лицее кызлары һәм Мичән урта мәктәбе егетләре күчмә кубокка ия булдылар. Барлык җиңүчеләрне дә чын күңелдән котлыйбыз!