Менә кабат иртә белән мәйданчыкка җыелдык. Өч көн килмәдек бит. Сабантуй бәйрәмнәрендә төрле уен һәм ярышларда көч сынаштык. Көрәш карадык, көч биреп тордык. Музыка уйнап тора, җырлар яңгырый. Бик күңелле үтте бәйрәм көннәре.

Отрядлар тулы составта иртәнге зарядка күнегүләре ясады. Хәрәкәтле уеннар уйнадык. Бераздан бергәләп иртәнге ашка кердек.

“Ял бүлмәсе”ндә “Кызыклы грамматика” булды. Без ребуслар, кроссвордлар чиштек. Кыскасы, баш ваттык. Аннары күңелле мультфильмнар карап алдык.

Бүген безгә Нурия апа театрда үзеңне ничек итеп әдәпле тотарга кирәклеге хакында сөйләде. Ямьсез гадәтләрне мисаллар өстендә аңлатты. Кеше һәрчак культуралы булырга тиеш.

Әле бүген безнең “Милли модалар театры” да оешты бит. Мода гел үзгәрүчән ул. Нишләргә? Кем нинди фасон уйлап таба ала инде! Фантазиябезне эшкә җиктек.

Төшке аш та килеп җитте. Пешекче апалар бик тәмле итеп сыйладылар. Рәхмәт!

Лагерыбызда узган бүгенге көн дә нәтиҗәле һәм күңелле булды. Инде өйләргә кайтыр сәгать якынлашты. Исән-имин генә әти-әниләр янына кайтып җитик. Сау булыгыз!