Бүген 10 июнь. Иртәнге линейкага тезелдек, балаларның исәбен алдык. Спорт мәйданчыгында күнегүләр ясадык, түгәрәк ясап йөгердек.Үпкәләребезгә саф һава суладык.

Аннары хәрәкәтле уеннар оештырдык. Кызлар малайларга каршы футбол уйнады. Хайруллина Зәлинә бик күп көч куйды, әмма малайлар җиңде шул. Бераздан пешекче апалар безне ашханәгә дәштеләр. Ашау тәмле иде.

“Ял бүлмәсе”ндә барыбыз да болынга сәяхәт өчен кагыйдәләр белән таныштык. Матур итеп тезелеп су буена - болынлыкка төшеп киттек. Аяк астындагы дару үләннәре белән таныштык, аларны гербарий өчен җыйдык. Һадиева Илнара, Сафиуллин Илназлар бигрәк тә кызыксынучан булдылар.

Сәгать 11дә безнең янга Алсу Равилевна килде һәм “Табигать һәм без” дип исемләнгән чара үткәрде. Болында йөрүебезнең файдасы сизелде, чөнки күп үләннәрне танып белдек.

Көтеп алган көндезге аш вакыты җитте. Ашыкмыйча гына ашадык, ә соңыннан апаларга рәхмәт әйттек.

Төшке аштан соң асфальтка рәсемнәр ясадык “Без тынычлык телибез” дип аталган конкурста катнаштык. Иң матур рәсем ясаучыларга бүләкләр тапшырдык

Балалар бүгенге көннән бик канәгать калдылар.