22 март көнне мәктәбебездә волейбол буенча зона ярышлары булып узды. Әлеге ярышта мәктәпләрдән 5 кызлар командасы, 6 егетләр командасы катнашты. Барлык командалар да бик көчле әзерлек белән килгәннәр иде. Шулай булса да, көчлеләр арасында да көчлерәкләр була. Әлеге ярышта да иң көлеләрне сайлап алу хөкемдарларга җиңел булмады. Соңгы нәтиҗә буенча кызлар арасында шәмәрдәнлеләргә, егетләр арасында курсабашлыларга тиңнәр булмады. Ә II урынны Курсабаш кызлары, Шәмәрдән егетләре, III урынны исә Шекше кызлары, Явлаштау егетләре яулады. Кызлар һәм егетләрне уңышлары белән котлыйбыз. I, II урыннарны яулаган егет һәм кызларга финал ярышларында да зур уңышлар телибез. Иң мөһиме имгәнүләрсез, сәламәт килеш уйнасыннар.