5 нче  декабрь көнне "Күңелле сәхнә" түгәрәге, "Театр яктылыкка, нурга илтә" факультатив дәрес кысаларында  6, 7 нче сыйныф укучылары  Казан шәһәренә экскурсиягә бардылар. Көннең беренче  яртысында сыйныфлар  Г.Камал исемендәге театрның «Шәрык клубы» Татар театры тарихының интерактив мультимедиа комплексына кунакка керделәр.  Анда татар театры тарихына багышланган мультимедиа комплексы «Вакыт елгасы» (театрның видео елъязмасы белән экран-дивар), спектакльләрдән AR-открыткалар, «Сәхнә арты» (театр буенча виртуаль экскурсия, грим, костюм бүлмәләре), «Серле сәхнә» (үз-үзеңне артистлар янында сәхнәдә булу тойгысы бирүче инсталляция), «Театр. Тарих. Шәхес» (милли театр сәнгатен формалаштыруга зур өлеш керткән шәхесләр һәм тарихи вакыйгалар турында интерактив проекцион китап), интерактив «Пазл» һәм башка кызыклы һәм мавыктыргыч экспозицияләр белән таныштылар.
     Г. Камал исемендәге татар Дәүләт Академия театры укучыларыбызны ишекләрен киң ачып каршы алды. Р.Галиуллинның «Көзге кайтаваз»  комедиясе укучыларны көлкеле, кызык вакыйгалар  аша туган телебез — татар теленә мәхәббәт һәм хөрмәт хисләре тәрбияләделәр. Әлеге файдалы ял өчен мәктәбебез директоры Ләйлә Мәсхүтовнага  рәхмәт җиткерәбез.