Бүген, 17 июнь, "Сәләтле балалар мәктәп-интернаты"ның "ИнтелҖәй" мәктәпяны ял һәм сәламәтләндерү лагеренда ял итүчеләр Юлбат авылында урнашкан "Туган як тарихын өйрәнү музее"на экскурсиягә бардылар. Музей житәкчеләре - озак еллар дәвамында тарих фәне укыткан Сафин Илдар Фәтхулла улы һәм рус теле һәм әдәбияты дәресләреннән белем биргән Сафина Рәмзия Габделбәр кызы. Илдар Фатхулловичны туган авылы тарихын өйрәнеп, "Юлбатым-Ямбулатым" китабын төзеп бастырган автор буларак та беләләр. Әлеге матур гаилә җитәкчелегендә оешкан музей үз эченэ 20 гасыр вакытындагы истәлекләрне туплаган.
     Анда шул вакыттагы йорт күренешләре, кулланылышта булган табак-савыт, игенчелек һөнәренең барлык нечкәлекләрен аңлаткан эш кораллары, тарихи вакыйгаларны хәтерләткән  әйберләр, иске китаплар, сүзлекләр һәм мактау кәгазьләре тупланган. Музей бик бай һәм күп мәгълүматны сыйдырган. Әлеге күңелле һәм файдалы сәяхәт өчен Сафиннар гаиләсенә зур рәхмәтебезне белдерәбез, алга таба да әлеге эшләрендә уңышлар телибез.