26нчы апрель көнне татар халкының бөек шагыйре Габдулла Тукайның туган көне уңаеннан  Саба районы мәгариф идарәсе белән “Саба дулкыннары” телерадиокомпаниясе  берлектә оештырган “Күңелләрдә – Тукай рухы” дип исемләнгән Тукай әсәрләрен яттан укучылар бәйгесен йомгаклау тантанасы үтте. Бәйгенең максаты – укучыларның һәм әти-әниләрнең иҗади мөмкинлекләрен ачырга ярдәм итү, татар теленә, татар әдәбиятына мәхәббәт тәрбияләү, кызыксыну уяту. Бәйгегә барлыгы 40ка якын эш кабул ителде,  анда Саба районы мәктәпләрендә белем алучы 1-11нче сыйныф укучылары катнашты.  Алар арасында Сәләтле балалар мәктәбенең укучылары һәм әти-әниләренең актив булуы аеруча да сөенечле. 
     5 сыйныф укучысы Бариев Данияр "Ир-егетләр арасында иң талантлы укучы", Агелова Диләрә 9-11 сыйныф укучылары арасында 2 урын яулады. 
     Мәктәбебезнең әти-әниләре һәрвакыт төрле ярыш-бәйгеләрдә актив катнашып киләләр. Монда да үзләренең иң яхшы булуларын тагын бер кат расладылар. Аубакировлар гаиләсе үз номинацияләрендә җиңүче, Галимбәковлар гаиләсе 2 урынга лаек булды. Хәлиловлар гаиләсе исә "Гаиләләр арасында иң үзенчәлекле чыгыш" номинациясендә җиңү яулады. 
     Афәрин! Катнашучыларны һәм җиңүчеләрне чын күңелдән котлыйбыз. Алга таба да уңышлар һәм сәламәтлек теләп калабыз!