14 нче март көнне мәктәбебезнең 8, 10, 11 нче сыйныф укучылары Казан шәһәренә экскурсиягә бардылар. Сәяхәт «Муса Җәлилнең музей-фатиры»ннан башланды. Киләсе тукталыш «Максим Горький һәм Федор Шаляпин музее»нда булды. Укучыларыбыз һәр музейдан да күп яңа мәгълүмат тупладылар, танылган шәхесләребез турында  истәлекләрне барладылар. Укучыларыбыз күңелендә аларның эш урыннанары, шәхси әйберләре аеруча да зур кызыксыну уятты.       
     Көннең икенче яртысында сәяхәтчеләр республикабызның  милли китапханәсе белән таныштылар. Китапханәнең тарихын, элеккеге бинадагы ремонт эшләре, яңа бинадагы яңалыклар, өстенлекләр турында якташ экскурсовод тәфсилләп сөйләде.
       Кичке Казан шәһәре белән бераз хозурланганнан соң, юлны Г.Камал исемендәге академия театрына тоттык. Анда Илгиз Зәйниевнең «Бию пәрие» спектакле укучыларыбыз күңеленә хуш килде: заманча бию, гаилә тәрбиясе, әти-әни белән бала мөнәсәбәтләрен һәрберез үз күңелебез аша үткәрдек.
      Әлеге файдалы һәм кызыклы ял өчен районыбызның мәгариф идарәсе җитәкчесе Шакиров Илфат Фоат улына, мәктәбебез директоры Дәүләтшин Нияз Илгиз улына зур рәхмәтебезне җиткерәбез.