18 апрель көнне Саба урта мәктәбендә укучылар өчен ифтар мәҗлесе үткәрелде. Әлеге чарада Сәләтле балалар мәктәбеннән 15 укучы катнашты. Балаларга авыз ачтыру район хакимияте, Саба мөхтәсибәте, район мәгариф бүлеге тарафыннан иганәчеләр, шәхси эшмәкәрләр, аерым затларның сәдака акчаларына оештырылды. Авыз ачу алдыннан район мөхтәсибенең яшьләр эшләре буенча урынбасары Алмаз Галимҗанов балаларга Рамазан ае кыйммәтләре, изге айда нинди саваплар эшләп булуы, мәрхәмәтлелек, үзара ярдәмләшү, әти-әни хакы, остаз-мөгаллимнәргә хөрмәт күрсәтү, гомумән, чын мөселман исеменә лаеклы булу өчен нинди сыйфатларга ия булырга кирәклеге хакында сөйләде. Балалар белән дини сорауларга багышланган кыска гына викторина да оештырылды. Ахшам намазына азан әйтелгәч, бәйрәм кунаклары авыз ачтылар һәм Саба районы мөхтәсибе Айнур хәзрәт Әхмәтов җитәкчелегендә ахшам намазы укылды. Фарыз гамәл үтәлгәннән соң, барысы да тезелешеп табын янына утырышты.Соңыннан  табын артында утыручылар тоткан уразаларның кабул булуын сорап, Аллаһ биргән ризыкларга шөкер кылып һәм  оештыручыларга рәхмәт әйтеп, кулларын догага күтәрделәр. Һәркемнең йөзендә шатлык һәм канәгатьлек  хисләре чагыла иде бу мәлләрдә. Әлеге чараны оештыручыларга рәхмәт әйтеп, районыбызда  мәктәп укучылары өчен тәүге тапкыр оештырылган бу саваплы чара дәвамлы булсын иде дигән теләктә калабыз.