27 март - театр көне уңаеннан һәм каникулларны күңелле, файдалы үткәрү максатыннан, 3 сыйныф укучылары район мәдәният йортына барып, "Сәяхәт" балалар театр студиясе тәкъдим иткән "Мактанчык әтәч" әкияти-пьесасын карадылар. Районыбызның яшь артистлары тарафыннан куелган әлеге тамаша бик эчтәлекле һәм матур булды. Яшь йолдызлар арасында мәктәбебезнең 10 сыйныф укучысы Хурамшина Фәридәнең дә булуы безне аеруча сөендерде. Әлеге пьесаны караучылар арасында мәктәбебездә эшләп килүче "Күңелле сәхнә" түгәрәгенә йөрүчеләр дә бар иде. Алар үзләренә тәҗрибә тупладылар, чын артистка нинди сыйфатлар хас булырга тиешлеген тагын бер кат күрделәр. Шушындый матур тамаша күрсәткәннәре өчен "Сәяхәт" балалар театр студиясенә һәм аларның җитәкчеләренә чиксез рәхмәтебезне җиткерәбез. Алга таба да иҗади уңышлар теләп калабыз.