18 нче февраль көнне башкалабыз Казан шәһәрендә республикакүләм «Аулак өй —  баттл» проектының ярымфинал һәм  финал этаплары  үтте. Ярымфиналда мәктәбебезнең «Дуслык иле» командасы (Командада:  Галиакберова Гөлнара, Гайзуллина Дилә, Фәләхова Талия, Сөләйманова Динә, Галимуллина Алия, Каримуллина Айсылу, Минһаҗева Динә,  Гайнетдинова Ландыш,  Галимҗанова Алия, Зарипова Чулпан  ) республикабызның һәр районыннан җиңүче булып чыккан укучылардан торган «Җыелма команда» белән көч сынашты һәм җиңеп финалга үтте. Ярыш бик кызу барды, биремнәрдә төп игътибар татар әдәбиятына, халкыбыз җырларына, гореф-гадәтләргә һәм иҗади номерларга бирелде. Финалда укучыларыбыз Казан шәһәренең Ш.Мәрҗани исемендәге 2 нче татар гимназиясе укучылары белән көч сынашты һәм югары нәтиҗә күрсәтте. Әлеге матур чара өчен «Үз өем» электрон журналы редакторы С.М.Җиһаншинага зур рәхмәтебезне белдерәбез, алга таба да иҗади уңышлар телибез.