31 нче гыйнвар көнне мәктәбебезнең 10 нчы сыйныф укучылары Саба туган якны өйрәнү музеена сәяхәт кылдылар. Әлеге музей   экспонатларга бик бай. Татар халкының борынгы тормыш-көнкүреш үрнәкләре аеруча кызыксыну уята. Һәрберсе әби-бабаларыбызның яшәешен күзалларга мөмкинлек бирә. Кадим Җәмитовның сынлы сәнгать үрнәкләре, Саба районы мәчетләре тарихы, мәдәнияты турында истәлекләр – барысы да зур кыйммәткә ия. Экскурсия тәмамлангач,   музей хезмәткәре Билалова И.Н. укучылар белән мастер-класс үткәрде.   Татар халкы борынгыдан көнкүреш предметларын бизәү, матурлау белән шөгыльләнгән. Шул исәптән савыт-сабаларны да. Укучылар   агач кашыкларга төрле бизәкләр ясадылар, агач предметларга бизәкләр төшерү буенча мәгълумат алдылар. Әлеге мастер-класс   балаларга бик ошады, рәсем төшерү бик мавыктыргыч булды. Экскурсия һәм мастер-класс өчен Илсия Нургаян кызына рәхмәт җиткерәбез. Халкыбызның көнкүреш сәнгатен балаларга өйрәтү, җиткерү зур әһәмияткә ия.