Соңгы вакытта милли бизәк элеметларын көндәлек киемнәрдә, бизәнү әйберләрендә дә күрергә була. Бу, әлбәттә, яхшы күренеш, чөнки халкыбызның гореф-гадәтләре саклана, буыннан-буынга күчә дигән сүз. Моның дәлиле булып калфак кигән татар кызларын, түбәтәй кигән ир-егетләрне төрле чараларда очратырга була. Шулай ук милли бизәкле футболкалар, кофталар киеп йөргән яшьләрне районыбыз урамнарында да еш күрәбез. Милли орнамент белән заманга яраклаштырып бизәнү әйберләре эшләүчеләрне инстаграм челтәреннән дә еш күзәтәбез.
     Бүген мәктәбебезнең 6, 8 нче сыйныф укучыларына да   2022 нче ел “Россиядә халык сәнгате һәм мәдәни мирасны саклау елы”   уңаеннан “Милли бизәкләрдә – халкыбыз тарихы” дип исемләнгән остаханәдә катнашырга насыйп булды. Чараның беренче өлешендә укучыларны китаплар һәм милли киемнәр күргәзмәсе белән таныштылар. Ә икенче өлешендә үз куллары белән сәйләннәрдән бизәнү әйберләре чиктеләр. Әлеге остаханәне үткәрүче районыбыз китапханәсе хезмәткәрләре И.И.Шакирҗановага, А.Р.Шамиловага зур рәхмәт белдерәбез.