Гаилә белән мәктәп арасындагы бәйләнеш, балаларны тәрбияләү методларының бердәмлеге – тәрбия мәсьәләсендәге төп принципларның берсе. Гаилә һәм мәктәп арасындагы бердәмлек төрле юллар белән гамәлгә ашырыла. Ата-аналар җыелышларында укытучылар укыту-тәрбия эшенең торышы турында чыгышлар ясыйлар, сыйныф җитәкчесе балаларның көндәлек режимын оештыру, өй эшләренә, уку­га кагылышлы күрсәтмәләр бирә. Әмма укытучылар белән ата-аналар бәйләнеше җыелышлар белән генә чикләнми. Шуларның төп күрсәткече булып Республикабызда үткәрелеп килүче “Тату сыйныф серләре” дип исемләнгән ата- аналар комететлары арасында баручы конкурс тора. Ел да узучы әлеге конкурста мәктәбебезнең әти- әниләр комитеты читтә калмый. 4 нче сыйныф укучылары, әти-әниләре, сыйныф җитәкчесе Шакирҗанова Ләйсән Рәшид кызы белән берлектә 29 нчы октябрь көнне мәктәп данын яклап зона турында чыгыш ясадылар һәм “Иң яхшылар” номинациясендә җинү яулауга ирештеләр. Шулай ук әлеге конкурс кысаларында Республикакүләм “Без бергә” конкурсының “Иҗади гаилә” номинациясе дә узды. Мәктәбебез данын Фархиевлар гаиләсе яклап, бик матур чыгыш ясадылар. Барлык катнашучыларга - әти-әниләргә, укучыларга һәм коллективка олы рәхмәтебезне белдерәбез. Гаиләләрегездә тигезлек, саулык-сәламәтлек теләп калабыз.