Октябрьнең бише көнне, ел саен илебездә Укытучылар көне билгеләп үтелә. Әлеге күркәм бәйрәм белән хөрмәтле мөгәллимнәребезне чын күңелдән котлыйбыз. Шушы уңайдан мәктәбебездәге “Алдынгылар хәрәкәте” укучылары остазларыбызны бәйрәм белән котладылар. Иртән мәктәпнең ишеге төбендә бертөркем укучылар үзләренең остазлары килүен көттеләр.Укытучыларыбызны күңелне күтәрә торган матур җырлар,күчтәнәчләр белән каршы алдылар.Шуннан соң актлар залында матур концерт программасы да әзерләгәннәр иде. Һәрбер укытучыга,техник хезмәткәргә шигырьләр яңгырады,җырлар җырланды.Бәйрәм концертын шушындый матур сүзләр белән тәмамладылар: ”Һөнәрегезгә һәрчак тугры булуыгыз, күңел сафлыгыгыз һәм тырышлыгыгыз өчен зур рәхмәт сезгә! Барыгызга да исәнлек-саулык, күңел күтәренкелеге, зур уңышлар, бетмәс-төкәнмәс энергия, эшегездә яңа үрләр яулавыгызны телибез! Сезнең һәр дәресегез укучыларны яңа белемнәргә, фәнни ачышларга этәрсен! Тормыш сезгә һәм укучыларыгызга бары тик “бишле” билгеләре генә куйсын”.Укытучылар күтәренке кәеф белән дәрескә кереп китте.