Милли мәдәниятләр һәм гореф-гадәтләр елын йомгаклап мәктәбебездә бик зур чара узды. Башлангыч сыйныф укучылары “Балага исем кушу” йоласын башкардылар.Бала тугач та аңарга тиз арада исем кушарга кирәк, бу йола татарларда атна-ун көн эчендә башкарыла.Балага исем кушу өчен имам чакырыла, гадәттә бәби туе уздырыла. Балага матур һәм бигрәк тә мәгънәле исем сайларга кирәк. Яңа туган сабыйга кушу өчен исем эзләгәндә, ул исемнең җыйнак, җиңел әйтелешле, яхшы мәгънәле һәм аһәңле булырга тиешлеген истә тоту зарури. Күркәм исемнәребез күп булганга, һәрбер ата- ана шулар арасыннан үзенә ошаганын, зәвыгына туры, күңеленә хуш килгәнен, әлбәттә, заман таләпләренә җавап бирә торганын сайлый ала. Сәхнә түрендәге талбишектә яңа туган бала ята.Шул арада бәби ашына кунакларыбыз тәмле күчтәнәчләр,бүләкләр төяп бәйрәмебезгә дә килеп җиттеләр.Барысы да баланың сау- сәламәт, тәүфыйклы,гомерле булуын теләделәр.Бәйрәм барышында залда утыручы укучылар, укытучылар да үз исемнәре нәрсә аңлатканны әйттеләр.Балага исем кушканнан соң хуҗа кеше барлык кунакларны чәй табынына чакырды.Бәйрәмнең икенче өлеше чәй табыны артында дәвам итте. Барлык кунакларыбыз да шат күңел белән таралыштылар.