Бүген барыбыз өчен дә  иң тантаналы һәм истәлекле көннәрнең берсе.Чыгарылыш сыйныф укучылары өчен соңгы кыңгырау яңгыраячак.Егерме өченче май көнне мәктәбебездә “Соңгы кыңгырау” бәйрәме булды. Тантаналы чарада Балык Бистәсе муниципаль районы Башлыгы урынбасары Әхмәтҗанова Фирдания Гомәр кызы, Котлы Бөкәш авыл җирлеге башлыгы Нәҗипов Рәшит Гәзиз улы, район кулланучылар җәмгыяте рәисе  Бариев Раил Нәгыйм улы, ветераннар катнашты. Килгән кунакларыбыз барлык укытучыларны, укучыларны,әти-әниләрне, ветераннарны бәйрәм белән котладылар. Чыгарылыш сыйныф укучылары дулкынландыргыч җыр башкардылар һәм традицион рәвештә вальс һәм күңелле флешмоб биеделәр. Сыйныф җитәкчеләренә, ата-аналарга һәм мәктәпкә рәхмәт сүзләрен җиткерделәр. 2012 елның 1 сентябрендә ак бантиклы, ак алъяпкыч кигән нәни кызлар, кара чалбар һәм ак күлмәкле шук малайларның тәүге тапкыр мәктәпкә укырга килгәнен хәтерлибез. Укучылар өчен дә, безнең өчен дә вакыт сизелмичә үтеп китте. Бүген сез олы тормыш бусагасында басып торасыз. Ышанычны аклагыз, максатларыгызга җитегез,кадерле укучылар!