Репрессия машинасы эшли башлаганнан бирле миллионлаган кеше нахакка репрессия корбаны булып җинаять җаваплылыгына тартылды, хезмәт төзәтү лагерьларына җибәрелде, бик күпләр бер гөнаһсызга юк ителде. Нахакка җәберләнгәннәрнең туганнарына һәм якыннарына, тулы бер гаиләләргә “Халык дошманы” келәймәсе сугылды. Кемгәдер сәяси һәм дини карашлары, кемгәдер социаль һәм милли билгеләре өчен “Сатлыкҗан” исеме тагылды. Әйе, бүгенге көндә исемнәре пычратылган кешеләргә яхшы исеме кире кайтарылды,  тик бик күп гөнаһсыз корбаннарга бу көннәрне күрү насыйп булмады.

Әнә шушы ваыйгаларга катнашы булган Тәнзилә Нәҗип кызы Идрисова белән очрашты Котлы-Бүкәш урта мәктәбенең 10нчы сыйныф укчылары. Тәнзилә апаның әнисе Галимова Миңнехаят апа репрессия корбаннары гаиләсеннән. Бик үтемле һәм җылы очрашу булды ул. Замана укучыларына  балачагын, яшьлек елларын бик мавыктыргыч итеп сөйләп, үгет-нәсыйхәтләрен дә бирде Тәнзилә Нәҗип кызы. Бу очрашуга – мондый явызлык безнең җәмгыятебездә башка беркайчан да кабатланмасын иде, дигән мәгънә салынды.