18 нче ноябрь көнне Вахитов районынының 41 нче мәктәбендә “Сөйләм калыпларына нигезләнеп, татар теленә өйрәтү технологиясе” дигән темага шәһәр семинары үтте. Семинарда Казан шәһәре мәктәпләренең татар теле һәм әдәбияты укытучылары катнашты.

КФУ ның доценты, филология фәннәре кандидаты Максимов Николай Валентинович “Бу кем? Кем нинди? Бу нәрсә? Нәрсә нинди? Кемгә нәрсә кирәк?” кебек сөйләм калыплары буенча 1б сыйныфында һәм шулай ук 3б сыйныфында ачык дәрес күрсәтте. Дәресләрдән соң укытучылар өчен “Әдәби хәзинә” музеена сәяхәт үткәрелде, музей – укыту-тәрбия эшенең үзәге булуы мәктәпнең эш тәҗрибәсеннән чыгып аңлатылды. Семинарда Казан шәһәре мәгариф идарәсенең баш белгече Баһавиева Рәйхана Әминовна, Казан шәһәре мәгариф идарәсе мәгълүмати бүлек методисты Зиннәтуллин Раиф Кәримуллович, Вахитов һәм Идел буе районнары мәгълүмати бүлек методисты Җиһангирова Миләүшә Васыловна да катнашты.  Соңыннан татар теле һәм әдәбияты укытучылары “Сөйләм калыпларына нигезләнеп, татар теленә өйрәтү технологиясе” буенча 1-4 сыйныфлар өчен булган программа һәм дәреслекләр турында фикер алыштылар һәм бу технологиянең уңышлы булуын әйттеләр. Семинар эшлекле һәм файдалы үтте.