Пенсионерлар өчен компьютерда өйрәнү буенча 72 сәгатьлек уку курслары эшли башлады. Кайбер “студент” ларның яше җитмешне үк узып китүгә дә карамастан, дәресне берәү дә калдырмый, билгеләнгән вакытта парта артына килеп утыра. Укучыларыбыз бик тәртипле, һәр биремне отып калырга тырышалар, конспект язалар, өстәмә сораулар да бирәләр. Әйе, без бүген фән- техника заманының иң алга киткән бер чорында яшибез. Шуңа күрә Татарстан Республикасы Президенты Р. Н. Минниханов республика пенсионерларын компьютер нигезләренә өйрәтүне бурыч итеп куйды. Киләчәктә дәүләт хезмәтләрен электрон төрдә башкаруны күз уңында тоткан әлеге проект пенсионерлар арасында киң яклау тапты. Укулар түләүсез,  дәресләр атнаның ике көнендә - дүшәмбе һәм пәнҗешәмбе көннәрендә үткәрелә. Әйе, хәзерге заманда аралашу һәм, гомумән, тормыш өчен интернет кирәк. Аннан өлкән яшьтәге кешеләр үзләренең күңелләренә ятышлы шөгыль таба алалар, аралашу, сәламәтлекләрен кайгырту, кул эшләре, түгәрәкләргә һәм экскурсияләргә бару мөмкинлекләре дә бар. Ә әлегә пенсионерлар дәрес барышында компьютер турында башлангыч күнекмә генә алалар, текст җыярга, хаталар төзәтергә өйрәнәләр. Бүгенге тормыш таләбе катгый, өйдән чыкмыйча гына электрон тәртиптә торак коммуналь хуҗалыклары хезмәтләре өчен исәп- хисап  ясау, табибка күренергә язылу һәм башкалар... компьютер аша гына башкарылачак. Шуңа күрә компьютер белән “син” дип сөйләшергә өйрәнү барыбыз өчен дә кирәк.

“Студентлар”ны  уку вакытында күрәсез.