Шатлыклар күңелебездә,
Ал кояш күгебездә.
Килегез, дуслар, кунакка,
Сабантуй буген бездә!

Менә шундый күтәренке күңел белән башланып китте безнең Питрәч районы Көек авылындагы “Алтын балык” балалар бакчасында Сабан туе.
Сабан туе уздырылачак мәйданчык педагоглар ярдәмендә алдан ук бәйрәмчә бизәлде: чигүле сөлгеләр, кулъяулыклар, төрле төстәге шарлар эленде. Милли киемнәр кигән балалар һәм тәрбиячеләр, чиккән сөлгеләр эленгән колгалар, гармун тотып, халкыбызның гореф-гадәтләрен искә алып, көянтә - чиләкләр белән мәйданга үттеләр.
“Сабан туе” җыры башкарылды. Бәйрэмгә тагы да ямь өстәп әби белән бабай килде. Алар үзләренең яшь чакларын искә төшерделәр, балалар белән күңел ачтылар.
Балалар да бәйрәмгә алдан әзерләнделәр: шигырьләр, җырлар, биюләр  өйрәнделәр.
Бәйрәмдә барлык балалар да бик теләп, кызыксынып катнаштылар. Алар милли уеннарда үз осталыкларын күрсәттеләр: “Чүлмәк вату”,”Капчык киеп йөгерү”, “Чиләк белән йөгерү”, “Бау тарту” һәм бик күп башка уеннар. Балалар өчен иң авыры- бәйләнгән күзләр белән чүлмәккә эләгү булды, алар бу сынауны да бик тырышып үттеләр.
Сабантуйда бер генә бала да бүләксез калмады. Бәйрәм  бик  күңелле үтте. Балалар да, өлкәннәр дә рәхәтләнеп күңел ачты.