Ниһаять, күпләр өчен көтеп  алган сентябрь дә килеп җитте. Укулар башланды. Быел “Фома урта гомуми мәктәбе” коллективы шактый зурайды. Биккол һәм Зирекле мәктәпләреннән  IX сыйныф укучылары гына түгел, ә бөтен мәктәп килеп укый торган булдылар. Шуңа бәйле рәвештә, мәктәптә башка еллардан аермалырак расписание һәм режим төзелде.     Мин дусларым белән сөйләшкән вакытта, алардан: ”Яңа сыйныфташларыгыз белән уртак тел табуы кыен түгелме?”-дип сорыйм. Аларның күбесе “Юк”-дип җавап бирәләр.   Яңа зур коллективта укучыларның аралашу мөмкинлеге киңәя, югары сыйныф укучылары өчен вузга китәр алдыннан үзенә  күрә адаптация дияргә була. Моннан тыш, мәктәп барлык кирәкле заманча җиһазлар белән баетылган. Бу—интерактив такталар, компьютер сыйныфлары, интернет һәм башкалар.   Мәктәптә 11 класс-комплект, 158 укучы, аларга 18 укытучы белем һәм тәрбия бирә. Укучыларны күрше Биккол һәм Зирекле авылларыннан 2 автобус ташып тора.Башлангыч сыйныфлар  өчен озынайтылган көн группасы ачылды. Анда ике тәрбияче балаларның ялларын кызыклы итеп үткәрүне кайгырталар, өй эшләрен эшләтүгә контрольлек итәләр. Бу укучылар мәктәптә ике мәртәбә ашый. Урта һәм югары сыйныф укучыларына да төшке аш ашаулары өстенә, өстәмә пирожки пешереп, 6 дәрестән соң чәй эчерелә. Яхшы уку һәм әйбәт тәрбия алу өчен мәктәптә барлык шартлар тудырылган. Безгә бары тик тырышып укырга һәм юлларда сак йөрергә генә кирәк.

    Хәерле сәгатьтә!

           Вилданова Энҗе