Милләттәшләребез туры Тукайның бүген дә, гадәтенчә, антына тугры калып,  халкына хезмәт итәчәгенә һич шикләнмиләр икән.  Әлбәттә, кәрәзле телефон, IT технологияләр дә аннан читтә булмаслар, интернетны ул максатчан куллана белер. Шулай да шагыйрь техникага мөкиббән китмәс, рухи шатлык өләшүче каләмгә өстенлек бирер, виртуаль дөньяны түгел, тормышны сөяр иде дигән фикерне күпләр хуплады. Әңгәмәдәшләребез туры Тукай заман проблемаларына карата үз фикерен әйтәчәк, доллар үсүен, юлларның төзексезлеген тәнкыйтьләячәк, укучыларга: “БДИ һәм ГИАдан курыкмагыз, Ходай биргән гомеребез алардан  кыйммәтрәк!” - дип киңәш итәр иде дип уйлыйлар. Бөек Тукай мөнбәрләрдән татарча сөйләргә оялмас, горурланып, милли кием, түбәтәйдән йөрер иде дип саныйлар. Азатлык, дуслык илендә Тукай һәркемгә кардәш булыр, һәммәбезгә тигез карар, бай-ярлыга бүлмәячәк дип белдерүчеләр дә табылды.

Белеп торсыннар: без, Тукай оныклары, бөек шагыйребез белән горурланабыз!