Фома урта мәктәбенең 5-7 нче сыйныф укучылары әниләре җыелышы уку сыйфатын күтәрү юлларына багышланган мастер-класс рәвешендә оештырылган иде. Башта идеал укучы турында хыялланып хисләнгән әниләр алдында проблемалы сорау туды. Әлеге сорауга җавапны төрле юллар белән эзләп карадылар. Җыелышта катнашучылар укучылар тарафыннан махсус әзерләнгән видеоязмалардагы хәлләргә үз мөнәсәбәтләрен белдерделәр, сыйныф җитәкчесе таныштырган хикәятләр хакында фикер алыштылар. Балада кечкенәдән җаваплылык хисләре тәрбияләү, мөстәкыйльлеккә өйрәтү мөһимлеге ассызыкланды, бала тәрбияләгәндә ата-аналарда кирәкле сыйфатлар искә төшерелде. Төркемнәрдә уку сыйфатын төшерү ихтималы тудырган гамәлләрне кисәтү һәм тыю билгеләре ясадылар. Рефлексия өлешендә һәр әни “Мин шуны аңладым...”, “Мин шуңа игътибар итәчәкмен...” кебек җөмләләрне дәвам итеп, үз фикерен әйтте. Мастер-класс һәркем күңелендә канәгатьлек хисләре уятты. Катнашучылар җыелышта алган белемнәр уку сыйфатын күтәрүдә ярдәм итәр дигән өмет белән таралыштылар.

        Гөлүсә Әһлиуллина, татар теле һәм әдәбияты укытучысы, 7 нче сыйныф җитәкчесе.