2 сентябрьдә Акбүре төп мәктәбендә "Белем бәйрәме" үтте. Бу тантанага Яңа Чишмә муниципаль районы Советы Аппараты җитәкчесе  Файзуллин Илдар Ханнат улы , авыл җирлеге башлыгы  Җәүдәт Мәхмүт улы Залалетдинов та катнашты. Алар балаларны яңа уку елы белән тәбрикләп, сәламәтлек, укуларында уңышлар теләделәр.  
Мәктәп директоры Латыпов Харис Харрас улы коллектив хезмәткәрләренә рәхмәтен җиткерде, балаларга шушы матур мәктәптә сөенеп, сәламәт булып эшләүне һәм укуны теләде.
Аннары сүз башкала кунагына – Илдар Ханнат улы Файзуллинга бирелде. Барлык укучыларны, коллективны, ата-аналарны, авыл халкын бәйрәм белән котлады, Район башлыгы В.М. Козлов һәм ТР Президенты исеменнән дә тәбрикләү җиткерде.
Авыл җирлеге башлыгы Җәүдәт Мәхмүт улы залда җыелган балаларга мөрәҗәгать итеп, югары уку йортларына, гомумән, тормышка сукмак мәктәп бусагасыннан салынуын, мәктәп биргән белемне беркайда да алып булмавын ассызыклап үтте, тырышып укырга чакырды, мәктәп партасы артында үткәргән һәр сәгатьнең файдага узуын теләде, яңа уку елы башлану белән котлап, балаларга һәм укытучыларга изге теләкләрен җиткерде.