Татар телендә хатасыз язарга өйрәтү, әдәби татар телен кулланучыларның даирәсен арттыру, орфографик һәм грамматик хаталарны тикшерү максатыннан республикабызда ничәнче ел рәттән Халыкара “Татарча диктант” яз акциясе үткәрелә. Бу чарадан безнең гимназия-интернат та читтә кала алмады. Үз базасында диктант яздыру пункты оештырды. Әлеге эшкә туган тел һәм әдәбият укытучылары җәлеп ителде.

Гимназиядә узган “Татарча диктант” яз акциясендә татар теле белән кызыксынучы укучылар, укытучылар, гимназия администрациясе, ата-аналар, апа-абыйлар, әби-бабайлар катнашты.

Диктант язу өчен текст быел юбиляр язучы Гомәр Бәшировның “Җидегән чишмә” әсәреннән җырның язылу тарихын яктырткан өзек алынган иде. Һәркемгә таныш әлеге җырның тууы турындагы мәгълүмат диктант язучыларга бик кызыклы булып тоелды. Алар, диктант язып, үзләренең мәктәп елларын, яшьлекләрен искә төшерделәр. Чарадан бик канәгать булып кайтып киттеләр!