3 нче апрель көнне 39 нчы балалар бакчасында “Сабыйларга багышланган гомер” дип исемләнгән кичә уздырылды. Тирән мәгънәгә ия үтә дә эчтәлекле мероприятиедә Түбән Кама муниципаль районы башкарма комитетының “Мәктәпкәчә мәгариф идарәсе” җитәкчесе Софина Ландыш Фәнисовна, профсоюз берлеге рәисе Әлфия Әзгамовна, Аксакаллар шурасы әгъзалары, микрорайон үзидарә рәисе – Ремида Мазитовна, 1,7,19,25,27,28,37,42,49,50,64 нче балалар бакчаларында хезмәт куючы мөдирләр, өлкән тәрбиячеләр, татар теле белгечләре, тәрбиячеләр, укытучылар, китапханәчеләр, “Кама таңнары” әдәби-берләшмәсе һәм Әлмәт шәһәре язучылары катнашты.

Бәйрәмне хәтерләтүче әлеге чараны, югары категорияле өлкән тәрбиячесе, җиде китап авторы Мирхазова Нурзия Рашит кызының тырыш хезмәтен зурлап иң элек Түбән Кама муниципаль районы башкарма комитетының “Мәктәпкәчә мәгариф идарәсе” җитәкчесе Софина Ландыш Фәнис кызы ачып җибәрде.  

“Сабыйларга багышланган гомер” дип исемләнгән чараның күп өлеше күптән түгел дөнья күргән, инде балалар яратып өлгергән “Бүләк” китабына багышланды. Бакчабызда тәрбияләнүче сабыйлар китапка кертелгән шигырьләрен сөйләделәр.

    “Бүләк” дип исемләнгән китапның балалар өчен генә булмавын, шул ук вакытта зурларга да ярдәме тиюен, “Бүләк” китабы белән тулысынча таныш булган, инде тәрбия һәм белем бирү эшендә уңышлы кулланырга өлгергән 64 нче балалар бакчасы тәрбиячесе – Халидә Галләм кызының саллы чыгышы аша Нурзия ханымның дөрестән дә педагог-язучы булуын ассызыклады. Ул үзенең чыгышында китапка кертелгән һәрбер шигырь буенча берәр дәрес үткәрерлек, хикәяләре бигрәк тә яшь, яңа эшли башлаган белгечләргә үтә дә зур ярдәмлек булып торуын искәртте...

Сабыйлар өчен онытылмаслык затлы бүләк, Нурзия Рашит кызы әйтмешли, шәхсән үзенә дә истәлекле бүләк китерде: 2013 елның 15 гыйнваренда педагог-язучы Татарстан Язучылар берлегенең Шәйхи Маннур исемендәге мәртәбәле премиясенә лаек булды. Күбебез бу турыда “Туган як” газетасыннан укып беләбез.