Бәхетле балачак һәм һәр сабыйның киләчәк тормышы аны кечкенәдән тәрбия кылучының зирәклеге, сабырлыгы һәм игътибарына бәйле. Шуңа да һәр баланың күңел дөньясын аңлап, йөрәгенә ачкыч таба белү зур тырышлык һәм эчке тоемлау таләп итә. Димәк, тәрбиячеләрнең һәм дә мәктәпкәчә белем бирү учреждениеләре хезмәткәрләренең һөнәре – гаять мөһим һәм җаваплы. Алар әти-әниләр белән берлектә нәниләр күңелендә кечкенәдән үк мәрхәмәтлелек, кайгыртучанлык, хезмәт сөючәнлек, максатчанлык хисләре тәрбиялиләр, аларның иҗади сәләтләрен үз вакытында күрә һәм үстерә беләләр.