Ата-аналар һәм тәрбиячеләр өчен консультация И С Ә Н Н Ә Р Н Е Ң К А Д Е Р Е Н Б Е Л , Ү Л Г Ә Н Н Ә Р Н Е Ң К А Б Е Р Е Н Б Е Л !

Ата-аналар һәм тәрбиячеләр өчен консультация

И С Ә Н Н Ә Р Н Е Ң К А Д Е Р Е Н Б Е Л ,

Ү Л Г Ә Н Н Ә Р Н Е Ң К А Б Е Р Е Н Б Е Л !

Безнең илебез ел саен Җиңү көнен бәйрәм итә. Бу бәйрәм 1945 елда нинди шатлыклы, тантаналы булса, хәзер дә халык бу Җиңүнең нинди зур югалтулар белән яулануын онытмый.

1941 елда көчле һәм явыз дошман илебезгә басып керде. Кешеләрнең тыныч йокысын меңләгән туп тавышы бүлде. Бөек Ватан сугышы башланды.

Юлбасарлар таптый илебезне,

Ватан сугышына мин китәм.

Менә - балам. Син әнкәсе аның,

Балабызны тотып ант итәм.

Синең өчен, шушы балам өчен,

Нәселем өчен, Туган ил өчен,

Мылтык тотып баскан җиремнән

Бер адым да артка чигенмәм.

Ташлар эри, металл яна. Кеше үлгәнче фашистларга каршы тора. Сугыш илебезгә зур бәла-каза алып килә. Генераль штабның рәсми мәгълүматларына караганда, илебезнең 8,5 миллион кешесе ут эчендә һәлак була. Фашистлар концлагерьларда, үзләре басып алган территорияләрдә атып, яндырып, асып үтергән кешкләр саны 19 миллионнан артып китә.

Бөек Ватан сугышында 1163 кеше Советлар Союзы Герое исеменә лаек була. Бу исем 154 сугышчыга 2 мәртәбә бирелә. 7 миллион кеше орден һәм медальләр белән, 16 миллион кеше «Хезмәттәге батырлык өчен» медале белән бүләкләнә.

Еллар бер-бер артлы үтә тора. Узган һәр ел безне 1418 көнгә сузылган дәһшәтле Бөек Ватан сугышыннан ераклаштыра.

Корбан булган ил уллары безнең хәтердә мәңге яшь, мәңге куркусыз булып яшәр!