Ел саен үткәрелә торган «Татарча диктант ЯЗ» акциясе бөтен Җир шарында яшәүче катнашучыларны җыя.  Татар теленә кызыксынуны арттыру, әдәби телдә дөрес сөйләм һәм дөрес язу күнекмәләрен үстерү, орфографик һәм грамматик хаталар ясамыйча язу теләге уяту, татар теле белгечләрен һәм туган тел (татар теле) укытучыларын тагын да популярлаштыру максатын күз уңында тоткан бу диктант  мәктәбебездә 25 ноябрь көнне узды. Бу көнне 52 мәктәп бинасы гөрләп торды, чөнки татарча диктант язарга теләк белдерүчеләр байтак булды. Алар арасында укучылар, аларның әти-әниләре, укытучылар бар иде. Диктантны татар теле һәм әдәбияты укытучылары, Яр Чаллы татар дәүләт драма театры артисты Лилия Рафаэль кызы укыды.  Быел диктантның тексты итеп Зөлфәт Хәкимнең "Бер сәгатьтә ничә мизгел бар?" романыннан өзек сайланылган. Диктантның нәтиҗәләре 27 декабрьдән соң diktant.tatar сайтында билгеле булачак.