Татар халкы гомер-гомергә ярдәмчеллеге, үзара булышлык белән дан тоткан. Апанаев, Рәмиев, Акчурин, Гаспралы һ.б. шундый олуг затларның исемнәре генә дә моңа зур дәлилдер. Элек- электән хәлле-маллы татар кешесе мәктәп-мәдрәсә ачкан, мәчет төзеткән, китап бастырган, газета-журналлар чыгарган. Бу күркәм гамәлләр, бердән, бик зур савап булып исәпләнсә, икенчедән телебезне, динебезне һәм милли үзаңны саклап калу юлында олы бер ярдәм.

    Шөкер, бүгенге көндә дә бар андый мәртәбәле затлар – хәләл көче белән тапкан малын хәйрия кылучылар. Яр Чаллы шәһәренең 52нче мәктәбендә менә икенче ел рәттән “Мәктәп даны” кичәсе үткәрелә. Әлеге чарада уку алдынгыларына премияләр тапшырыла. Сабыйларны куандыра, укуга омтылыш булдыра торган әлеге чара мәктәбебездә 30 гыйнвар көнне быел да булып узды.

   “Мәктәп даны” премияләрен тапшыру чарасының хәйриячесе Илмир Фәрид улы Вәлиуллин 2004 нче  елда мәктәбебезне тәмамлаган. Кечкенәдән үк тырыш, аң-белемгә хирыс булган ул. Мәктәпне көмеш медаль белән бетергән. Хәзергесе көндә “Чишмә” җаваплылыгы чикләнгән җәмгыятенең директоры булып эшли. “Үзем белем алган, миңа тәрбия һәм гыйлем канатлары куйган мәктәбемә ярдәм итәсе килү теләге күңелдә күптәннән йөри иде инде. Бүгенге көн күзлегеннән караганда да, укучыларда белемгә омтылу өчен матди стимул булдыру бик мөһим нәрсә бит”,- дип үз фикерләре белән уртаклаша Илмир әфәнде.

     Узган уку елында өлкән сыйныфта “бишле” һәм “дүртле” билгеләренә укучыларга акчалата степендия  тапшырса, быел премия алучы укучылар күбрәк булды. Мәктәпнең 33  укучысына конвертлар тапшырды ул. Алар арасында фән олимпиадалары җиңүчеләре, шәһәр һәм республикакүләм чараларда актив катнашучылар һәм уку алдынгылары бар иде. Премиянең күләме дә укучы бала өчен шактый ук саллы –  3 мең сумнан алып 10 мең сумга кадәр.

   “Минем өчен бу бүләк – бик зур куаныч. Һич көтелмәгән сөенеч!” – дип шатлыгы белән уртаклаша 5 а сыйныфы укучысы Мулләхмәтова Эльвина Ул быел татар теле фәненнән шәһәр олипиадасында 3 урын алган. “Татар телен бик яратам. Укытучым Дания Васил кызы Баһаутдинова да моны сизеп алган, күрәсең. Татар теленнән фән олимпиадасында катнашырга бик теләп ризалаштым. Дәресләрдән соң да, көзге каникуллар вакытында да укытучым белән тырышып әзерләндек. Бүген менә тырышлыгымның нәтиҗәсен күрәм. Әти-әниемә 10 мең сум алып кайтып бирәм бүген!”- ди, шатлыктан балкып торган бала.

    Укучылар “Мәктәп даны” кичәсеннән яхшы, күтәренке кәеф белән таралды. Йөзләрендә елмаю, йөрәктә шатлык иде. Киләсе уку елында да укуда һәм төрле чараларда, фәнни бәйгеләрдә алдынгы булу теләге – стимул бар иде күңелләрендә. Әйе, мәктәп – белем һәм тәрбия бирү йорты. Еллар узгач та бу изге йортка килеп игелек орлыклары чәчүчеләр бар икән, димәк мәктәп үз вазыйфасын үтәгән һәм үтәп килә дигән сүз.

   52 нче мәктәп коллективы, ата-аналар һәм, әлбәттә, киләчәгебез – укучылар исеменнән Илмир Фәрид улы   Вәлиуллинга мең рәхмәт! Мондый олы җанлы кешеләр барда татар мәгарифе үсешенә, киләчәккә өметебез зур!

  52 нче мәктәпнең татар теле  һәм әдәбияты

 укытучысы Сираева Лилия Фәиз кызы.