Менә 7 ел рәттән без, 33 нче мәктәп укучылары,  “Милли бизәк” шәһәр программасында катнашып киләбез. Бу программа кысаларында шәһәребездә Корбан бәйрәмен зурлап үткәрү гадәткә керде. Быел да, Изге Корбан гаете бәйрәме көннәрендә, 18 нче мәктәптә Изге бәйрәмебезне зурлап үткәрдек. Бәйрәм белән бергә бәйге дә үткәрелде. Бәйгедә катнашу өчен алдан сораулар җибәрелгән иде. Шунлыктан,  без, бәйгегә әзерлек барышында, дин буенча  белемнәребезне арттырдык, шигырьләр, мөнәҗәтләр өйрәндек. Без үзебез өчен дә  бик күп нәрсәләр белдек, чөнки сорауларга җаваплар табу өчен, без күп китаплар укыдык, интернеттан файдаландык.Тырышлыгыбыз бушка китмәде: без бәйгедән җиңү белән кайттык. “Сорау-җавап ” бәйгесендә  команда белән сорауларга җавап яздык һәм 38 балл җыеп 1 нче урынны, “Мөнәҗәтләр бәйгесендә” 8б класс укучысы Шәмсемөхәммәтова Рәмилә изгелек турындагы мөнәҗәт әйтеп  2 нче урынны, ә команда белән 1 нче Дәрәҗәдәге Диплом белән бүләкләндек. Безне бу бәйгегә әзерләгән укытучыбыз Дамира Гыйлмехәмәт кызы Низаметдинова да Диплом белән бүләкләнде. Бәйгедән соң, без ашханәдә Корбан итеннән әзерләнгән аш белән, тәм-томнар белән сыйландык, вәгазьләр тыңлау да безнең күңелебезгә хуш килде.

8нче б сыйныфы укучысы Шамилова Язилә