Күптән түгел балалар бакчалары арасында шәһәр күләмендә бөек шагыйребез Габдулла Тукайның туган көненә багышланган «Тукай яши безнең күңелләрдә-2025»  исеме астында шигырь укучылар бәйгесе уздырылды. Бәйгедә барысы 109 балалар бакчасы катнашты. Шуларның 22 се 1 урынга лаек булды.  Бүген бакчабызда шушы бәйгедә җиңүчеләр катнашында бәйрәм оетырылды. Бәйрәм Г.Тукайның «Бәйрәм бүген» җыры белән башланып китте.  Бәйрәмгә кунак булып шагыйрә Әлфия Мирзанур кызы Ситдыйкова да килгән иде. Су анасы белән Шүрәле балаларны әкият иленә алып китеп, уйнатып, ял иттереп алдылар. Бәйрәм бик күңелле рухта узды. Ахырда бергәләшеп «Туган тел» җырын җырладылар. Бәйрәмне бакчабызның яшь артисты, Түбән Кама шәһәрендә уздырылган Республика күләмендәге «Туган тел» гаилә фестивале җиңүчесе Гатауллина Ясминә, әтисе баянда уйнап,  «Матур булсын» җыры белән тәмамлады. Бәйрәмнән барысы да күтәренке рух белән кайтып киттеләр.