Балалар бакчасының  иң зур бурычы – һәрьяклап үскән, белемле, укымышлы, көчле   ихтыярлы, иҗади фикер йөртә, матурлыкка омтыла белә торган камил шәхес тәрбияләү. Шушы бурычларны тормышка ашыру өчен бакчабызда барлык шартлар да булдырылган: җылы, якты, иркен, барысы да күңелгә ятышлы итеп җиһазланган, бизәлгән.  Программа таләпләреннән чыгып, дәүләт телләрен өйрәтү өчен дә шартлар тудырылган.

           Безнең 41 нче “Умырзая” балалар бакчасында нәниләр татар һәм ана телләрен теләп өйрәнәләр, шәһәркүләм шигырь бәйгеләрендә дә актив катнашалар, татар телендә кечкенә күләмле шигырьләрне, җырларны, мәкаль һәм табышмакларны  рус балалары да теләп өйрәнә, әкиятләр дә сәхнәләштерәбез.

            Ана теле эшчәнлекләрендә балалар логик фикер йөртергә, гади гомумиләштерүләр ясарга, бәйләнешле итеп сөйләргә, үз фикереңне билгеле бер эзлеклелектә эйтеп бирергә, үзләренең кичерешләрен, күзәтүләрен сүзләр белән аңлатырга өйрәнәләр. Рус балаларын татар теленә өйрәткәндә, өйрәнелә торган материалны бала үзләштерә ала торган дәрәҗәдә генә биреп, баланы диалог төзергә өйрәтәбез. Балалар өчен фигыльләрне истә калдыру катлаулырак. Шуңа күрә,мәктәпкә әзерлек төркемендә балалар үзләре “син нишлисең?” соравына җавап бирердәй рәсемнәр  ясыйлар. Мондый рәсемнәрне алар бергәләп әти-әниләре белән дә  ясыйлар һәм нәтиҗәдә өйдә дә татар телен кабатлыйлар.  Бу рәсемнәргә карап балалар горурлык белән сөйлиләр: мин утырам, мин сикерәм, мин җырлыйм, мин биим... Шулай итеп, үзләре дә сизмәстән, гаилә белән татар телендә өйрәнгән материалны кабатлыйлар. Мондый рәсемнәрне әти-әниләре фотога төшереп тә алып киләләр. Фигыльләрне белдергән, үзләренең төрле хәрәкәттә төшерелгән фотоларын күреп, бала кызыксынып, үзе турында һәм нинди хәрәкәтне белдерүе турында  сөйли, мәсәлән: “Бу –мин . Мин – Коля. Мин – зур малай. Мин сикерәм”.  “Танышу” темасына план-схема төзү баларга бигрәк тә кызыксындырырлык чара булды.  Шул схемага карап, ике бала диалог төзи. Ә уку елы азагында  бу рәсемнәрне һәм фотоларны  кулланып, тәрбиячеләребез иҗади газета эшлиләр. Бакчабызда бу чара традициягә әверелде. Газета исемнәре, эчтәлеге татар һәм ана телен өйрәнүгә ихтирам һәм кызыксыну булуын күрсәтеп тора: “Татарча сөйләшәбез”, “Татарча да яхшы бел, русча да яхшы бел”, “Татар телем – иркә гөлем”, “Туган телдә сөйләш, балам...”, “Күңелле пешекчеләр”, “Татарча уйный, җырлый өйрәнәбез”, “Туган телле балам”.  Шул иҗади газеталарны берсен сезгә дә тәкъдим итәбез.